Tíðindi: Arbeiðsmarknaður Ι 08. januar 2018
Nýggj sBók um arbeiðsmarknaðin
Nám, arbeiðarafeløgini og arbeiðsgevarafelagið standa í felag fyri útgávuni.

 

Føroya Arbeiðsgevarafelag og tey fimm arbeiðarafeløgini tóku í 2016 stig til at fáa til vega undirvísingartilfar um føroyska arbeiðsmarknaðin. Hetta varð gjørt í sambandi við, at tað í 2016 vóru 100 ár liðin, síðan fyrsti kollektivi sáttmálin millum tvey feløg á landi varð gjørdur.

 

Feløgini settu seg í samband við Nám um at gera tilfarið. Nám stendur fyri og hevur serkunnleika til undirvísingartilfar til føroysku skúlarnar.

 

sBókin Arbeiðsmarknaðurin er nú tøk, og er sum útgangsstøði ætlað til undirvísingina í samfelagsfrøði á miðnám.

 

Helgi Abrahamsen hevur skrivað bókina. Hann hevur lagt stóran dent á at skriva tilfarið soleiðis, at tað er lætt at skilja. Av somu orsøk kunnu summir partar eisini verða brúktir í hádeild fólkaskúlans.

 

Gingið verður ígjøgnum ymiskar fyriskipanir á arbeiðsmarknaðinum, og viðgjørt verður hvønn týdning hesar hava fyri okkara samfelag. Nógvir tættir eru í samlaðu myndini, og Nám sigur í kunningina um bókina, at tað hevur verið ein avbjóðing at velja ímillum, hvat skuldi við, og hvat ikki skuldi við.

 

Føroya Arbeiðsgevarafelag fegnast um sBókina, sum er ógvuliga væl úr hondum greidd, og felagið fegnast um, at tað nú er undirvísingartilfar um føroyska arbeiðsmarknaðin tøkt til skúlarnar at nýta.

 

Arbeiðsmarknaðurin er ókeypis sBók, og er at finna her.

 

Fleiri tíðindi í hesum bólki
Fleiri tíðindi